بسم الله الرحمان الرحيم
إلى كل من رمى بوالديه في ديار العجزاء نصيحة في الله لك
حرام عليك عيب وعار
يا عاجبة واش صرالك
الله يسطر يا سطّار
تنكر يمّاك اللي ولداتك
نسيت ياما ذاقت لمرار
وسهرت الليالي في جالك
وكيما انكرتها يا نكّار
غدوة ينكروك ولادك
أنسيت كي كانت حاملة بيك
في شهور الحمل ياما قاسات
فالنهار او فالليل خايفة عليك
وصابرة لهاذوك الوجعات
جابتك لدنيا وبقات فيك
أترّبي وزادت مع اليامات
أتنّحي من لحمها وتعطيك
غير باش أتكبرك هذا ما نوات
فاتوا عوام وبديت تكبر
عمرها ما قالت بركاني
أتوكّل تغسل او تسهر
أستعرف وكونك حقّاني
حنن قلبك لا يكون حجر
كل شيئ امسجّل عند الفوقاني
قادر يبليك بدعوة الشّر
الدايم ربي وكل شيء فاني
يا حسراه ليلة زواجك
دموع الفرحة بين عينيها
كانت خايفة لا تحضر لك
لكن الله استاجب ليها
قدّرها المولا وزوجاتك
ودارت الملزوم اللي عليها
وتمنات تشوف ولادك
أنكرت الخير وغدرت بيها
كبرَتْ وخانتها الركبة
قلالت صحتها ونحانت
ولاَتْ ما تديش العتبة
عيانة في مكانها سكنت
يا حسراه نهار كانت لبّة
كانت تاكلة عليك او طمعت
ما درات تلعب لها اللعبة
بسبابك أنتَََََ اللي انظلمَتْ
كذبتْ عليها وخرجتها من الدار
ما درات راك غادي بيها لوين
دهشانة وغابوا لها لفكار
ودموع عيونها مجريين
كافيتها بغرفة في سبيطار
بين أقراينها منسيين
يدها على خدها ليل ونهار
أتوحشت وليدها لحنين
أدّي كلامي نصيحة وافهم
ولا تنسى واش جا فالسورات
قول النبي في حديثه اتكلّمْ
الجنة تحت قدام الأمهات
بعد صلاتي على النبي نختم
سليمان فطان كاتب لبيات
عافينا يا الله ما نشوفوا هّمْ
وخفَفْ علينا يوم المامات
حرام عليك عيب وعار
يا عاجبة واش صرالك
الله يسطر يا سطّار
تنكر يمّاك اللي ولداتك
نسيت ياما ذاقت لمرار
وسهرت الليالي في جالك
وكيما انكرتها يا نكّار
غدوة ينكروك ولادك
حقوق الكلمات محفوظة
كلمات : verseau22
;
ولمن يريد سماعها لكم الفيديو لكن الموسيقة ليست لي إنها للمرحوم كمال مسعودي
https://www.youtube.com/watch?v=j8KwoKP9J8o
موضوع: إلى كل من رمى بوالديه في ديار العجزاء نصيحة في الله لك 
السبت مايو 01, 2010 10:08 pm
